ՑԵԽՈՏ ՄԱՐԴԻԿ
ԷԻՆ ՎԵՐԵՎՈՒՄ
Օրվա գնումներից հոգնած
տուն մտավ`տասը մատից մի –մի տոպրակ կախ: Մատներն ասես չափագրված լինեին`ծանրությունից կարմիր գծվել էին: Դեռ
չէր հասցրել hետևից դուռը կողպել, երբ սենյակից ընդառաջ եկավ տղան:
-Խի զանգը չտվիր, ես
կբացեի դուռը,- բարյացկամ ասաց տասնհինգ տարեկան որդին և ձեռքի մեջ հավաքելով լիքը
տոպրակների բերանները տարավ խոհանոց:
-Ինչ իմանայի տանն ես, բալես,-որդուն
ժպտաց մայրը:
-Հա, մամ, քիչ մնաց
մոռանայի` քիչ առաջ մի մարդ եկավ մեր տուն: Պտտվեց մեր տան մեջ, մի լավ նայեց
խոհանոցի դրվածքն ու գնաց:
-Ինչ տեսակ մարդ էր,- հետաքրքրվեց
Շողիկը մի քիչ վախեցած,- ոչինչ չփոխանցեց:?
_ Չէ, ոչ մի բան էլ
չասաց:
-Բա չասեց` ուր են
մեծերդ, ինչի համար է եկել:
-Չէ, բան չասեց, բայց ոնց
որ կողքի հարևանն էր, ոնց որ ասեց, հա ասեց, որ մեր կողքի հարևանն է,- մտահիշեց
որդին ու ավելացրեց`մամ, մեր քեռուն շատ էր նման էդ մարդը:
Հիշեց, որ մի քանի օր
առաջ պատուհանից նայելիս բակում կանգնած տեսել էր այդ մարդուն`քաչալ գլխով, տռուզ
կառուցվածքով, մաքուր հագուկապով, քառասունին մոտ տղամարդ էր: Առաջին պահին իրեն
թվացել էր ավագ եղբայրն է, հետո տեսել էր որ`չէ, անծանոթ մարդ է: Ավելի ուշ իմացել
էր, որ նոր հարևանն է:
-Բնակարանի վերանորոգում
է անում, երևի ինչոր բան հետաքրքրել է ,- մտածեց Շողիկն ու նեղսրտեց.
-Տեսնես կպրծնենք դրանից,
գլուխներս տարել է շխկ ու թխկով:
Կողքի հարևանի տնից
այնպես էին դմդմբացնում, որ Շողիկին թվում էր հիմա պատը կփլեն:
-Պատ-պատի հարևան ենք, գնամ
տեսնեմ ինչ են անում,- մի օր համարձակություն
հավաքած Շողիկը որոշել էր չամաչել:
Բախտը բերեց, եղբոր նման
հարևանը տանը չէր, բանվորներն էին աշխատում: Ասենք տանն էլ լիներ, ինչ պիտի
փոխվեր: Կոմպլեքսները մեկ խանգարել, մեկ օգնել են նրան: Բանվորներից իմացավ, որ
քիչ է մնացել խոհանոցի պատը քանդեն ու իրենց տուն մտնեն: Անցք են փորել, տեսել են
իր տան լույսն ու հասկացել, որ պատը երկտակ չէ, բարակացնելու տեղ չկա :
-Լավ ենք պրծել,- փորձել
է կատակել Շողիկն ու բանվորներին ժպտացել:
Արդեն քանի տասնամյակ ամուսին չուներ`զոհվել էր: Դրանում ինքը մեղք չուներ: Վատ է
զգում, որ իմանում են ու իրեն անմարդ կնոջ տեղ դնում: Բայց ինքը ինչքան
էլ ամաչկոտ լիներ, գիտեր որ ուժեղ մարդ է`գոնե պաշտպանվել
կարող է:
Հարևանի տնից թխկուշխկը գնալով օր օրի պակասում էր, բաց պատշգամբից կանացի ձայներ էին գալիս: Մի օր պատշգամբից - պատշգամբ ծանոթացավ նոր հարևանի մոր հետ: Հետո բակում հանդիպեցին: Զրույցի մեջ իմացավ, որ նախկինում մանկապարտեզի վարիչ է
աշխատել, որ նրա որդին պաշտոնյա է, բայց հավակնություն ունի ավելի բարձր պաշտոնի:
-Տղաս հիմա բաժնի պետի տեղալ է, հենց բաժնի պետ նշանակեն պատշգամբը պիտի առաջ տանք,
մեծացնենք,- մի օր անկեղծացել էր Շողիկին:
Շողիկը երեսանց ցույց չէր տվել, որ չի հավատում: Ախր ով թույլ կտար` բոլորի
աչքի առաջ, փողոցի կողմից ծռմռել
շենքը: Բայց մի օր Շողիկն արթնացել էր առաջվանից էլ ուժեղ դմբոցներից: Կողքի հարևանի համար հաշիվ չէր նորոգած
տան մի սենյակի հատակը նորից քանդելը: Նա գնել էր իր մուտքի հարթակի բոլոր բնակարաններն ու հիմա փողոցի կողմի երկու բնակարանների պատշգամբները միացնում էր իրար դեպի փողոց մի բան էլ
առաջանալով:
Ինչ էլ արագ դարձավ բաժնի պետ,- անցավ Շողիկի մտքով: Բայց հեչ սրտովը չէր հարևանի արարքը: Ախր հիմնական պատին մեծ անցքեր էր փորել տվել, էդ ծանր <<շվելերները>> մտցրել,
մետաղե ամրանները կապկպել, պտտող մոմենտ կա, շենքի թուլանալ կա,- մտահոգվել էր, բայց դե որտեղ բոլոր բնակիչները,
այնտեղ էլ ինքը: Մարդն իր համար հարմարություններ էր ստեղծում,
խորովածի համար էլ բուխարիկը չէր մոռացել ի ցույց դնել:
-Լավ, փող ունի-ունի, թող գնար աչքից հեռու տարածք
առներ, սեփական տուն շիներ,- իրար մեջ նեղվում էին հարևաններով:
-Չէ, էդպես ոնց կլինի, իրեն պետք է, որ իր միակ
տղան եզ չմեծանա, բակի երեխաների հետ շփվի,- կատակել էր հարևաններից մեկը:
-Եզ է որ կա, հաստավիզի
մեկն է,-
խնդացել էր մյուսը:
-Մինուճար է`էդ մեկն ունի, վախենում է
երևի ու դրա համար չի մեկուսանում:
Նկատել էր, որ հարևանի հաստավիզ որդին բակում տղաներով է
շրջապատված լինում: Մի օր տեսել էր, որ թաքուն ծխախոտ է
բաժանում գլխին հավաքվածներին:
-Չէ, էդպես ընկերություն
չեն անում,- մտածել էր: Հաստատ էդ լակոտին չեն սիրում, պարզապես օգտագործում
են: Տեսնես իր հարուստ հարևանն ինչ պիտի անի, որ իրեն սիրեն.
-Գուդ բայ, մայ լայֆ, գուդբայ,-
կնոջ համար իր բաց պատշգամբում
գիշերվա հազարին քեֆը լավ երգում էր նոր հարևանը: Իսկ իր քունը չէր տանում հազար ու մի տակ հոգսի արթնությունից: Ինչու ինքը ամաչեր, հենց պիտի տաներ ու աղբը շրխկոցով գցեր փողոցում դրված աղբամանը: Չալարեց, վերցրեց ապակյա տարայով լի տոպրակն ու փողոց ելավ: Դատարկ աղբամանից ելնող սառը զրնգոցը դիպավ գիշերվա երեսին: Լավ էր հարևանը հասկացող դուրս եկավ`կնոջն առավ ու բաց պատշգամբից
տուն մտավ: Չէ, նրա բախտը հաստատ չի բերել, որ իր նման սիրտը կոտրած հարևանուհի ունի: Լուրեր
են պտտվում, որ նորանշանակ քաղաքապետը նրա դասընկերն է
եղել: Ասում են` համատեղ բիզնես էլ ունեն, ասում են նաև, որ ժամանակին սրան ազատել է
ունեցած հսկա պարտքերի բեռից: Հիմա իր մտքովն էլ էր անցնում հարևանին դիմել աշխատանքի տեղ գտնելու համար:
Հետո փոշմանեց`անիմաստ էր: Մի օր որոշեց տունն առաջարկել նրան`գուցե իր տունն էլ գնի, էդպես գոնե իրեն օգնած կլիներ` տղաներն ընտանիքներով կառանձնանային: Պատասխանը միանշանակ ոչ էր եղել: Նույնիսկ վաճառքի գինը չէր հարցրել:
Իր նմանները պիտի կռանան, կռանան հոգսի բեռի տակ, որ էլ չկարողանան
գլուխները վեր բարձրացնել, մեկի աչքի գերանը տեսնել, մեկելի աչքի վերևի հոնքը: Երևի հարևանին ուրախացրեց իր խեղճ վիճակը, գոնե չիմանար: Ոնց կուզենար, որ դիմած չլիներ: Ախր հիմա նա հաստատ գիտի, որ իրենց տեղը նեղ է:
Մի օր էլ բակում շինարարական եռուզեռ սկսվեց: Ինչ որ մեկի երկաթե ավտոտնակը հայտնվեց բակի կենտրոնում, իսկ նրա տեղը փորող մեքենա էր աշխատում: Թվում էր, թե նախկին թիթեղյա ավտոտնակի չափով կառուցվում է
քարե ավտոտնակ: Բայց դրված պատը երկու մետրի չափով մտել էր խաղահրապարակ:
Հետո երկրորդ ավտոտնակը տեղից բարձրացվեց, էլի պատ դրվեց: Էս նոր պատն էլ մեկելից երկու մետր ավելի քիթը խոթեց դեպի խաղահրապարակ:
-Էս ինչ են կառուցում,
ով է
սրա տերը,- հենց այնպես հարցրեց
շենքի բնակիչներից մեկին:
-Դու կիմանաս,
քո մոտիկ հարևանն է,
մենք ինչ իմանանք ինչ է
կառուցում,- այնպես էին թթվել վրեն, որ Շողիկը վատ էր զգացել հարցնելու համար:
Հարց ու պատասխանից հասկացել էր, որ էս ամենը բնակիչների սրտովը չէր: Ամբողջ բակը շինհրապարակի էր վերածվել, փոշուկեղտի մեջ կորչում էին խաղացող
երեխաները: Որ հանկարծ քամի էլ ելնում էր`մեծերն էլ էին տուն փախչում:
-Տեսնում
ես ինչ է
անում,- մի օր ասաց դիմացի հարևանուհին,- Էս չորս- հինգ շենքի բնակիչների
աչքի առաջ:
Իրենց բակը
շենքերով շրջափակված էր, փողոցից կտրված, բիզնեսկենտրոններից հեռու, խախանդ:
-Էսքան մարդու
աչքի առաջ,- շարունակեց հարևանուհին,-
բոլորին արհամարած ունի, թքած ունի: Թվում է,
թե պիտի ուրախանանք, որ երկհարկանի` սիրուն, մեծ առանձնատուն է
լինելու բակի էս փտած ավտոտնակների տեղում,- շարունակեց նա,- բայց կատաղում եմ: Սա ինչ անելու բան էր: Համայնքի ղեկավարը ավտոտնակների տերերին մեկ-մեկ իր մոտ է
կանչել: Պատկերացնում ես`տասներեք ավտոտնակ քանդվել է:
-Ափսոսում
ես, որ դու էլ ավտոտնակ չունեիր,- հարցրել էր, երբ հարևանուհու ձայնի մեջ ափսոսանք
էր որսացել:
-Ուզում
էի էդ ավտոտնակներից մեկը գնել, վերևիս հարևանուհին լեզվիս տակն իմանալով գործիս խփեց` ինձանից առաջ ընկավ, ինքն առավ: Հիմա որ գնած լինեի, ամեն ինչ այլ կլիներ:
-Չէիր վաճառի
հարևանիս,- կասկածանքով հարցրել էր նրան:?
-Չէ, անօրենին
կկանխեի:
-Երկու ծայրերի
ավտոտնակները ոնց է
եղել, որ մնացել են: Գումարին չեն ?գայթակղվել,- խոսքը փոխել էր Շողիկը:
-Էս ծայրինը
չգիտեմ, բայց էն ծայրինի տերը յաման խորամանկն է:
Ասում է
սեփականաշնորհած է:
Մեկ էլ տեսար պետությունը դրա տեղը բնակարան
տվեց: Չէ, հլա դու դրա խելքին նայիր, հատած հանգած ջանին ու պառավ հալին մի նայիր:
-էդ ով, է,- տեղը չբերելով
հարցրեց Շողիկը:
-Բակում
մեկը կա է,
տեսած կլինես էդ տղային`համ աջ է
կաղում, համ ձախ:
-Հա, ոնց չէ, տեսել եմ: Շատ տհաճ երևույթ
է:
Բա որ մեկ-մեկ տղությունը բռնումա`կնանոնց ետևից ռեպլիկներ է գցում:
-Իսկը բնության
ծաղր է:
Աչքերը`շլդիկ, մեջքին`սապատ: Քայլելիս էլ աջ ձեռքը օդում այնպես է
տանում բերում` ասես քամի է որսում: Էդ վիճակով ոտի հետ էլ պլաստմասե
շիշ ու միշա տշում…
-Լսիր, դրա մայրը լավ է մտածել: Հա, թող իրենք տուն ստանան,- բարիացավ Շողիկը:
-Հա, բայց իրենք դիմացի
շենքում բնակարան ունեն:
-Ոչինչ, թող երկրորդն
էլ ունենան:
-Չէ, ես ինչն եմ ասում`դրա պառավ մոր խորամանկությանը
նայիր:
-Էն մեկել ավտոտնակի
տերը պապիկ է,
զինվորական օդաչու է
եղել,- շարունակեց Շողիկը հարևանուհուց
ավելին իմանալու ակնկալիքով:
-Հա, ամուսինս
իրեն շատ է
հարգում, հետը ընկերություն է
անում, երեկոները գնում շախմատ ու նարդի են խաղում:
-Հա, կարգին
պապիկ է:
Բակի ցայտաղբյուրը ինքը նորոգեց, պտուտակ դրեց, որ ջուրն անտեղի չհոսի: Էս անօրինական շինարարության հետ կապված շատ էր նեղվում, ասում էր քառասուն տարվա <<լյոտչիկա>> եղել, շքանշաններ ունի, բայց հլա իրեն ապրուստին, հլա սրան:
-Ի, էդ շքանշանները`հեչ: Պապս դրանց ասում էր`ջիբումդ
օդ են բաց թողնում,- խնդմնդաց
հարևանուհին:
-Բան չհասկացա,-
զարմացավ Շողիկը:
-Ինչ կա չհասկանալու`գրպանդ
դատարկ է,
ձեռքդ փող չեն տալիս, շքանշանը կշտանալիք չէ:
-Հա, պարզ է: Էս մեր քառասուն
տարվա օդաչուի ստաժ ունեցող պապիկին
հարցրի, թե ինչու բողոքի ձայն չի հանում: Ասաց` ում ասի: Ինչ իմանա, որ ձեն հանի, էդ անօրենը ինչ կանի: Կարողա ամբողջ բակի սեփականաշնորհման թուղթ բերի ու հլա մի բան էլ ինքը մեղավոր դուրս գա:
-Լսիր, բա որ մի օր արթնանաք
ու տեսնենք որ բակն իրոք սեփականաշնորված է,-մտահոգվեց
հարևանուհին: Ամբողջ խաղահրապարակը ապամոնտաժվել է`ոչ ճոճանակն են թողել, ոչ սղարանը: Ձիուկի
համար էր թոռս բակ իջնում, չկա, հանել են տարել: Հետոյի մասին էլ է հոգացել, որ երեխաները
չխաղան բակում, աղմուկ չլինի:
-Չէ, սա էսպես չի մնա: Մի օր դրանից
խելոքը կգա ու ձեռքից կառնի արած - դրածը,-հետո ավելացրեց`իրենից ավելի անօրենը հո կգտնվի,- տխուր ժպտաց ինքն
իր ասածից:
Բակ իջան: Կառուցվող շենքի կողմը հայացքը չէր ուզում թեքել: Ցայտաղբյուրի մոտ ջուր խմող տղա երեխաներ կային`սիրալիր բարևեցին:
-Հեյ, շուտ արեք, ջուրը միացրեք,-
վեր բարձրացած երկհարկանի շինության վրայից զայրացկոտ ձայնեց
վարպետը:
Երեխաները հանցավորի պես խառնվեցին իրար` ձեռքից ձեռք
տալով ռետինե խողովակը` փորձելով հագցնել ցայտաղբյուրի
բկին:
Ցայտաղբյուրին միացված ռետինե խողովակով հոսող ջրի հետ հայացքը վեր բարձրացավ` ցեխոտ մարդիկ էին վերևում….
Комментариев нет:
Отправить комментарий